Simptoma të ndryshme që duhen trajtuar ndryshe: në spitalin pediatrik të Sankt Augustin, pranë Bonit, në Gjermani, fëmijët e shtruar në spital pasi janë infektuar me variantin Omicron, kanë një pasqyrë klinike të paprecedentë.
Në të njëjtën kohë, kohëzgjatja e qëndrimit në spital për pacientët e vegjël u reduktua.
Gerd Horneff është drejtor mjekësor në Sankt Augustin. Ai shpjegon se çfarë ka ndryshuar: “Kjo sëmundje shkakton kryesisht probleme gastrointestinale ose patologji të përgjithshme. Fëmijët duket se kanë helmim të gjakut, sepse kanë shumë dhimbje, kanë nevojë për transfuzion. Nuk hanë dhe nuk pinë, por nuk kanë sëmundje të frymëmarrjes”.
Sëmundjet më të rënda të rrugëve të frymëmarrjes, të ndodhura gjatë valës së parë të Covid-it, me fëmijë edhe në terapi intensive për javë të tëra, nuk ekzistojnë më.
Por pandemia dhe rrethanat që pasuan, kanë shkaktuar dëme të tjera te fëmijët, të lidhura me kufizimet e miratuara për të frenuar përhapjen e infektimit.
“Ne kemi parë një rritje të problemeve psikologjike – shpjegon Horneff – Për shembull, nuk kam parë kurrë kaq shumë fëmijë që vuajnë nga anoreksia dhe sëmuren aq rëndë sa duhet të shtrohen në spital si në këtë periudhë pandemie”.
Spitali ka gjithashtu një qendër vaksinimi për fëmijët. Më shumë se 6000 doza janë kryer që nga dhjetori. Pothuajse 20% e 5 milionë e 300 mijë fëmijëve të moshës 5 deri në 11 vjeç janë vaksinuar të paktën një herë dhe pothuajse 60% e adoleshentëve deri në 17 vjeç janë tashmë në dozën e dytë./Opinion.al
