Presidenti i Austrisë Alexander Van der Bellen ka kërkuar falje pasi qëndroi në një restorant përtej orës së lejuar nga masat e vendosura për shkak të pandemisë së koronavirusit
Van der Bellen tha që ai kishte humbur sensin e kohës ndërsa fliste me miqtë në një restorant në qendër të qytetit.
“Më vjen keq sinqerisht. Ishte një gabim,” tha Van der Bellen.
“Dola për herë të parë nga izolimi me dy miq dhe gruan time”, ka shkruar ai në Twitter. “Ne atëherë humbëm sensin e kohës ndërsa bisedonim.”
Presidenti u vu re nga policia në zonën e jashtme të restorantit menjëherë pak pas mesnatës të së dielës, raportojnë mediat lokale.
Restoranti ku u zu ‘’mat’’ presidenti austriak quhet “Sole” dhe ka për pronar një shqiptar. Restoranti “Sole” ka pronar gastronomin me origjinë shqiptare nga Tetova, Aki Nuredini, i cili e ka të hapur që nga viti 1983 dhe gjendet në një nga rrugët më të frekuentuara të Vjenës.
Sipas rregullave të qeverisë restorantet dhe kafenetë, të cilat u lejuan të rihapeshin javën e kaluar, duhet të mbyllen jo më vonë se ora 23:00.
Restoranti mund të gjobitej për shkelje, por presidenti Van der Bellen tha se ai “do të marrë përgjegjësitë” nëse pronari pëson humbje si rezultat i incidentit.
“Ne u mbyllëm pas një raundi të fundit të pijeve në kohë në orën 23:00, siç kërkohet me ligj,” i tha Nuredini për gazetën Krone.
Ai tha se kishte menduar që klientët të lejoheshin të qëndronin në tarracë përtej kohës së lejuar nëse dëshironin. /Opinion.al
