Ministri i Shëndetësisë në Maqedoninë e Veriut, Venko Filipçe, ka njoftuar se numri i infektimeve të reja dhe i të shtruarve nëpër spitale si pasojë e Covid-19 po rritet me shpejtësi të madhe dhe se në javët e ardhshme situata mund të bëhet kritike.
“Numri i infektimeve dhe i pacientëve, ditëve të fundit, në përgjithësi po rritet në vend. Nëse shihet dinamika e rritjes së shifrave mund të themi se në javët në vazhdim mund të kemi një situatë kritike”.
Rritje të infektimeve të reja dhe të pacientëve shënohen në disa qytete sikurse në Tetovë, Gostivar, Kërçovë e Kumanovë.
“Në këto qytete po mbushen repartet infektive dhe një pjesë e pacientëve transferohen për në Shkup. Tashmë po aktivizohen covid-qendrat tjera. Sistemi është i përgatitur, mjekët dhe ekipet gjithashtu janë gati për t`u përballur me presionin e kësaj vale”.
Duke filluar nga e Hëna, qytetarët përveç certifikatës së vaksinimit ose vërtetimin për dy dozat e pranuara, nëpër objektet hotelerike do të mund të hyjnë edhe me vërtetimin se e kanë kaluar Covidin, por vetëm 45 ditët e para nga dita e shërimit.
“Është periudha për të kaluar 30 ditët e domosdoshme pas shërimit, 15 ditë që të organizohet vaksinimi. Zgjidhja e vetme është të rritet përfshirja e vaksinimit. Nëse qytetarët kanë dilema, dëshmi është se qytetarët e vaksinuar infektohen me përqindje shumë të vogël”.
Ministri ka theksuar se analizat tregojë se numri i lartë i infektimeve shënohet nëpër qytetet ku është shumë e ulët përqindja e vaksinimit të popullatës.
Nga gjithsej 3.497 pacientët që janë diagnostikuar gjatë shtatë ditëve të kaluara, 3.047 prej tyre nuk kanë qenë të vaksinuar, që do të thotë se vetëm 10% janë të vaksinuar dhe gjenden të shtruar në spital me situatë stabile shëndetësore.
Ajo që i inkurajon autoritetet e shëndetësisë në Maqedoninë e Veriut është se nga rreth 400 mijë qytetarë që kanë marrë dy doza, vetëm 0.002% janë infektuar me COVID-19./ Klan Macedonia
