Kryetari i Partisë Demokratike, Lulzim Basha ka reaguar në lidhje me situatën e krijuar nga pandemia COVID-19 në vendin tonë.
Përmes një postimi në “Twitter”, Basha shprehet se Shqipëria ka nevojë për rritje të numrit të testimeve për koronavirus si dhe për krijimin e një fondi për të ndihmuar personat e infektuar.
Teksa thekson se kryeministri Edi Rama ka humbur kontrollin mbi pandeminë, kryedemokrati thotë se numri i të sëmurëve nga Covid-19 po rritet çdo ditë, fatalitetet po shtohen dhe kapacitetet shëndetësore po shkojnë drejt kolapsit.
Sipas tij, sikur qeveria të kishte dëgjuar thirrjet e PD, tashmë do të ishin marrë masat e duhura ndaj pandemisë.
“Në vend të llafeve, sot më shumë se kurrë duhen vendime dhe veprime të shpejta për të rritur testimet dhe fonde për të ndihmuar të sëmurët, shëndetësinë dhe ekonominë. Asgjë nuk është më e çmuar se jeta e njerëzve! Numri i të sëmurëve nga Covid-19 po rritet përditë, fatalitetet po shtohen dhe kapacitetet shëndetësore po shkojnë drejt kolapsit. Rama ka humbur kontrollin mbi pandeminë, megjithëse vala e dytë ishte paralajmëruar. Po të na kishte dëgjuar, qeveria do kishte marrë masat e duhura.”-shkruan Basha./ Opinion.al
