Koronavirusi vazhdon të përhapet me ritme të shpejta në Shqipëri, duke rritur bilancin e viktimave.
Lidhur me situatën në të cilën ndodhet vendi për shkak të pandemisë, ka reaguar ish-deputeti i Partisë Demokratike Bardh Spahia.
Përmes një postimi në rrjetet sociale, Spahia shprehet se testet serologjike nuk japin rezultate të sakta, ndërsa ka dhënë dhe një rast i cili kur është testuar tek laboratori i QSUT del negativ dhe kur është testuar tek spitali amerikan ka dalë pozitiv.
Ish-deputeti hedh dyshime se me testet serologjike mund të jetë e njëjta situatë me tamponët që, që sipas tij, rezultojnë fals.
Postimi i ish-deputetit
EDHE TESTET SEROLOGJIKE ME REZULTAT TE GABUAR, QEVERIA HESHT!
Pas tamponëve që nuk japin rezultatin e saktë, vijnë denoncime edhe për testet serologjike! Ka ndodhur tek personeli shëndetësor i vetë laboratorit të QSUT! Një anëtar i këtij personeli testohet tek laboratori i QSUT dhe del negativ. Përsërit testin serologjik tek spitali amerikan dhe del pozitiv!!!!
A kemi problem me procedurat e testimit apo kitet e përdorura? Si ka mundësi që i njëjti test del me rezultate të ndryshme në dy laboratorë të ndryshëm?
A kemi një situatë edhe me testet serologjike, si me tamponët që rezultojnë fals negativë? Pse vazhdon mungesa e transparencës për këtë situatë?
Kjo qeveri nuk i është përgjigjur asnjëherë pyetjes, se a po përdor testet e marra nga Kina të cilat, për shkak se nxirrnin rezultat fals, u kthyen mbrapsht nga Spanja e para e më pas vende të tjera të Europës!
Akoma më serioze është situata, pasi mbetemi vendi me numrin më të ulët të testeve në rajon, edhe ato me rezultate të dyshimta!
Serbia: 80 519 teste/1 milionë banorë
Mali i Zi: 58 515 teste /1 milionë banorë
Maqedonia e Veriut 51 300 teste /1 milionë banorë
Bosnje Hercegovina: 43 910 teste /1 milionë banorë
Shqipëria: 13 033 teste/1 milionë banorë./ Opinion.al
