Në përpjekje për të frenuar përhapjen e koronavirusit, nga sot, e hënë 30 Mars, Rusia ka mbyllur kufijtë, ndërsa Moska ka urdhëruar 12 milionë banorët e saj të qëndrojnë në shtëpi.
Ata do të lejohen të dalin vetëm për të blerë ushqime, për punë, për trajtime mjekësore ose nevoja të tjera urgjente.
“Gradualisht, por në mënyrë të qëndrueshme, do të vazhdojmë të forcojmë kontrollin, ashtu siç është e nevojshme në këtë situatë”, u shpreh qytetari i parë i Moskës, Sergei Sobyanin.
Autoritetet në Moskë gjithashtu kanë mbyllur qendrat tregtare, restorantet dhe parqet e mëdha, për së paku një javë.
Mbyllja e kufijve nuk do të aplikohet për diplomatët rusë apo drejtuesit e kamionëve të mallrave.
Zyrtarët rusë të shëndetësisë kanë paralajmëruar se një rritje e mprehtë e numrit të rasteve në vend pritet në ditët në vijim, për shkak të testimeve të shtuara në Moskë.
Numri i të infektuarve me koronavirus në Rusi ka kaluar 1,500, ndërsa tetë pacientë kanë humbur jetën./Opinion.al
