Teksa koronavirusi vijon të përhapet me ritme të shpejta në të gjithë botën, shkencëtarë dhe studiues punojnë për të zbuluar pasojat që shkakton ky virus si dhe për gjetjen e një vaksine anti-COVID.
Ndërkohë, sipas një studimi, është zbuluar se më shumë se gjysma e njerëzve që morën trajtim për COVID-19 vuanin nga një çrregullim psikiatrik një muaj më vonë, shkruan The Guardian.
Nga 402 pacientë të monitoruar, 55 për qind kishin të paktën një çrregullim psikiatrik, deklaruan ekspertët nga spitali San Raffaelo në Milano. Rezultatet, bazuar në intervistat klinike dhe pyetësorët e vetëvlerësimit, treguan çrregullim të stresit post-traumatik (PTSD) në 28 për qind të rasteve, depresion në 31 për qind dhe ankth në 42 për qind. Për më tepër, 40 për qind e pacientëve kishin pagjumësi dhe 20 për qind kishin simptoma të çrregullimit obsesiv-kompulsiv.
Zbulimet do të rrisin shqetësimet në lidhje me efektet psikologjike të virusit. Artikulli i titulluar “Sjellja dhe Imuniteti” shkruan ndër të tjerash se “duke marrë parasysh ndikimin alarmant të infeksionit COVID-19 në shëndetin mendor, duhet të vlerësoni psikologjinë e të mbijetuarve nga koronavirusi dhe të thelloni studimet, për të diagnostikuar dhe trajtuar shqetësimet psikiatrike”.
Studimi u krye te 265 burra dhe 137 gra. Sipas studimit gratë kanë më pak gjasa të vdesin nga COVID-19 në krahasim me burrat – por psikologjikisht vuanin më shumë se burrat. Pacientët me diagnoza psikiatrike të mëparshme pozitive kanë vuajtur më shumë se ata pa histori të çrregullimit psikiatrik. Studiuesit, të udhëhequr nga Dr Mario Gennaro Mazza, thanë se këto rezultate ishin në përputhje me studimet e mëparshme epidemiologjike.
Ata thanë që efektet psikiatrike mund të shkaktohen “nga reagimi imunitar ndaj vetë virusit, ose nga stresi psikologjik si izolimi social, ndikimi psikologjik i një sëmundje të re të rëndë dhe potencialisht fatale, shqetësimet për infektimin e të tjerëve dhe stigma.”
Pacientët treguan rritje të ankthit dhe shqetësime të gjumit, dhe për çudi kohëzgjatja e shtrimit në spital lidhet anasjelltas me simptomat e PTSD, depresionit, ankthit dhe OC.
Studiuesit thanë se “Duke marrë parasysh ashpërsinë e COVID-19 te pacientët e shtruar në spital, ky studim tregon se kujdesi shëndetësor ka rritur izolimin shoqëror dhe vetminë ”.
Ka pasur paralajmërime nga ekspertët në Mbretërinë e Bashkuar në lidhje me çrregullimet e trurit te pacientët me COVID-19. Problemet si inflamacioni i trurit, goditja në tru dhe psikoza kanë qenë të lidhura me koronavirusin.
