Kryeministri Edi Rama ka deklaruar se vaksinimi kundër koronavirusit në Shqipëri do të nisë në mes të muajit janar.
Rama tha se Shqipëria është shumë pranë një marrëveshjeje me kompanitë farmaceutike për mbërritjen e vaksinës anti-COVID në vendin tonë.
“Dua t’iu informoj që jemi në përpjekje intensive për vaksinën. Më vjen keq kur dëgjoj lloj lloj hamendjesh dhe teorish sepse faktikisht, situata e përgjithshme është shumë domethënëse sa i përket një ngërçi të përgjithshëm në raport kërkesë-ofertë. Mbani parasysh një shifër, Italia, e cila ka nisur vaksinimin dy-tre ditë më parë, kë në dispozicion 9700 vaksina. Kjo ka qenë pjesa e parë e dozave që ka marrë Italia, vend i BE dhe popullsi të konsiderueshme. Ndërkohë, çka ka ndodhur në nivelin Europian, pjesa e parë e dozave është ndarë mes vendeve dhe ndërkohë, ju është lënë vendeve të negociojnë me vende dhe palë të tjera për të ndarë nga paketa e tyre. Nga ana tjetër, dua t’iu bëj me dije se kompanitë bëjnë marrëveshje, të cilat janë të lidhur me shtetet. Nuk ka një marrëveshje tani, e cila bëhet drejtpërdrejtë me kompaninë dhe në mënyrë bilaterale t’i blen sipas asaj që ofron, por marrëveshja është e lidhur me shtetet me të cilat Pfizer ka vendosur vijat e para të komunikimit. Kur them shteteve, kam parasysh BE-në si një entitet të tërë. Në SHBA ka një ndalesë me një akt të presidentit, që asnjë dozë nuk mund të dalë nga SHBA. I gjithë ky ngërç i takon vetëm fazës së parë, pasi prodhimi do të rritet. Ne jemi të bindur që do të fillojmë vaksinimin pa pritur që të kalojmë ose të kalojë ky ngërç. Do ta fillojmë vaksinimin brenda janarit. Unë kam një tendencë që në mes të janarit do të fillojmë vaksinimin me mjekët dhe pjesën më vulnerabël. Jemi në diskutime edhe me AstraZeneca dhe Moderna. Besoj se shumë shpejt do të finalizojmë edhe marrëveshjen me Pfizer”, u shpreh Rama./ Opinion.al
