Tre persona janë arrestuar në qytetin e Durrësit, për prodhim dhe shitje të lëndëve narkotike kryer në bashkëpunim.
Mësohet se në pranga kanë rënë:
E. Ç., 28 vjeç, banues në lagjen nr. 6 Durrës, i dënuar më parë për veprimtari kriminale në fushën e narkotikëve (organizatori i kësaj veprimtarie kriminale dhe poseduesi i lëndës narkotike).
F. K., 20 vjeç, shpërndarësi i lëndës narkotike, si dhe M. M., 20 vjeçe, banues në lagjen nr. 18, Durrës, bashkëpunëtore e shpërndarësit të lëndës narkotike.
E gjithë skema funksiononte në këtë mënyrë, 28 vjeçari siguronte lëndën narkotike të cilësisë së lartë, heroinë e kokainë dhe për ta shpërndarë përdorte 20-vjeçarin, i cili ndihmohej edhe nga vajza me iniciale M.M.
Kokaina ose heroina shitej në qytetin e Durrësit me doza që varionin nga 40 deri në 100 euro një, dhe në momentin e arrestimit, shpërndarësi u kap me 11 doza heroinë dhe 5 doza kokainë.
Policia njofton se gjatë kontrollit, kanë sekuestruar 244 gr lëndë narkotike e dyshuar e llojit heroinë dhe 11 doza; 239 gr. lëndë narkotike e dyshuar e llojit kokainë dhe 5 doza; 2 peshore elektronike; rreth 5 milion lekë të vjetra), e përfituar nga shitja e lëndës narkotike, si dhe një biçikletë që përdorte F. K., për të shpërndarë./Opinion.al
