Pandemia COVID-19 vijon të përhapet në të gjithë botën. Sipas statistikave të fundit të Universitetit Johns Hopkins, në të gjithë botën janë regjistruar 4 milion e 101 mijë e 974 persona të infektuar, ndërsa numri i viktimave ka shkuar në 280 mijë e 451 persona.
SHBA mbetet vendi më i goditur, duke konfirmua dhe një të tretën e vdekjeve nga pandemia. Ekspertët paralajmërojnë se numri i vërtetë i infeksioneve mund të jetë shumë më i lartë, pasi shumë vende kanë testime të ulëta dhe për rrjedhojë kanë të dhëna të paplota.
Numri ditor i vdekjeve po vazhdon të bjerë në disa shtete, përfshirë Spanjën, por ekziston shqetësimi se lehtësimi i kufizimeve të bllokimit mund të çojë në një “valë të dytë” të infeksioneve.
Ndërkohë, qeveritë po bëjnë gati për pasojat ekonomike pasi pandemia goditi tregjet globale dhe zinxhirët e furnizimit.
Një zyrtar i lartë kinez ka thënë për mediat lokale se pandemia ishte një “provë e madhe” që kishte ekspozuar dobësitë në sistemin e shëndetit publik të vendit.
Deklarata e drejtorit të Komisionit Kombëtar të Shëndetit të Kinës, Li Bin, vjen pas kritikave të qëndrueshme jashtë vendit për përgjigjen e hershme të Kinës ndaj infeksionit.
Këtë javë, disa masa bllokimi kanë filluar të lehtësohen në Itali, dikur epiqendra globale e pandemisë. Qytetarët italian kanë mundur të dalin jashtë dhe të vizitojnë anëtarët e familjes në rajonin e tyre.
Franca ka regjistruar numrin e saj më të ulët ditor të vdekjeve për më shumë se një muaj, me 80 vdekje gjatë 24 orëve të fundit. Autoritetet po përgatiten të lehtësojnë kufizimet nga e hëna, siç ka vepruar edhe qeveria në Spanjë.
Ndërkohë, mbylljet po vazhdojnë në vende si Afrika e Jugut, pavarësisht thirrjeve nga partitë opozitare që ajo të përfundojë. Rusia anuloi një aktivitet ushtarak në Moskë, e planifikuar si pjesë e festimeve të Ditës së Fitores së vendit.
Por, pavarësisht provave shkencore, drejtuesit e disa vendeve kanë vazhduar të shprehin skepticizëm për virusin dhe nevojën për kufizime. Në Bjellorusi, mijëra ushtarë marshuan për të festuar Ditën e Fitores, pasi Presidenti Aleksandër Lukashenko hodhi poshtë thirrjet për masa më të ashpra.
Revista mjekësore britanike “The Lancet” ka shkruar një editorial për Presidentin brazilian Jair Bolsonaro, duke e quajtur atë kërcënimin më të madh për aftësinë e vendit të tij për të ngadalësuar përhapjen e koronavirusit.
Brazili aktualisht po raporton numrin më të madh të rasteve në Amerikën Latine, me mbi 10,000 raste të reja të shtunën, duke e çuar numrin e përgjithshëm kombëtar në afro 156,000.
Por, pavarësisht shpërthimit, Presidenti Bolsonaro vazhdon të hedhë poshtë ashpërsinë e virusit dhe është përplasur me qeveritarët për masat e bllokimit.
Frustrimet për shpërthimin u bënë të dhunshme në Afganistan, dhe të paktën gjashtë njerëz vdiqën gjatë përleshjeve midis protestuesve dhe forcave të sigurisë.
Dhuna filloi pasi demonstruesit u mblodhën në Firozkoh, kryeqytetin e provincës Ghor, për t’u ankuar për dështimin e perceptuar të qeverisë për të ndihmuar të varfrit gjatë pandemisë./ Opinion.al
