Situata e pandemisë ka bërë që Gjermania të marrë masa të reja kufizuese. Prej të mërkurës deri më 10 Janar, do të mbyllen shumica e dyqaneve shkollave dhe qendrave të kujdesit ditor.
Lajmi u dha nga kancelarja gjermane Angela Merkel, në një konferencë për shtyp pas takimit me udhëheqësit federalë dhe shtetërorë gjermanë. Merkel theksoi se masat e marra deri më tani për kufizime të pjesshme nuk kanë dhënë rezultatin e pritshëm.
“Masat e vendosura më 2 nëntor nuk kanë vepruar sa duhet. Ne jemi përsëri dëshmitarë të një rritje të rasteve me COVID dhe një rritje eksponenciale të infeksionit. Ne e dimë që sistemi shëndetësor është tashmë shumë i lodhur. Ne kemi nevojë për veprime urgjente. Qëllimi mbetet që vendi të arrijë në shifrat e 50 rasteve të reja më 100 000 banorë në 7 ditë. Ky do të jetë një bllokim i vështirë dhe që do të zgjasë midis 16 dhjetorit dhe 10 janarit “, ka deklaruar Merkel.
Vetëm dyqanet thelbësore të tilla si supermarkete, farmaci dhe banka do të qëndrojnë të hapura. Po ashtu do të ndalohet shitja e fishekzjarrëve përpara natës së Vitit të Ri.
Këto kufizime kanë ardhur për shkak se numri i rasteve të konfirmuara të koronavirusit në Gjermani u rrit me 20,200 ditën e fundit duke shkuar në 1,320,716 që nga fillimi i pandemisë. Edhe numri i vdekjeve vijon të jetë i lartë, pasi raportohet 21,787 humbje jete./Opinion.al
