Shqipëria po përballet ditët e fundit me rritje të numrit të viktimave dhe të personave të infektuar nga koronavirusi.
Lidhur me situatën e krijuar në vendin tonë, ka reaguar Shefi i Urgjencës Kombëtare, Skëndër Brataj, i cili u bën apel qytetarëve të respektojnë masat anti-COVID.
Brataj është shprehur për “Abc News”, se mbi 60% e personave të infektuar me koronavirus kanë forma të lehta dhe simptoma të parrezikshme.
Ai tha se këto simptoma trajtohen në banesë pa pasur nevojë të dërgohen në spital, por duke u konsultuar me mjekun e familjes dhe Urgjencën Kombëtare.
Brataj tha se që nga fillimi i pandemisë në Urgjencën Kombëtare janë regjistruar 329 mijë thirrje.
“Njerëzit të lidhen me 127, të mos shkojnë vetë drejt spitalit. Njerëzit duhet të sqarojnë se kur marrin te 127, do skedohen dhe do lidhem me epidemiologët. Mbi 60% e njerëzve vazhdojnë të kenë forma të lehta dhe simptoma të parrezikshme. Me këto simptoma mund të trajtohesh në banesë. Me temperaturë këshillimi bëhet nga mjeku. Ata kontaktohen çdo ditë nga mjeku i familjes. Në orare të natës mund të marrin 127 dhe i referojnë situatën ku ndodhen. Shumë njerëz kanë temperaturë dhe pasi marrin paracetamol nuk i ulet temperatura. Por ndoshta duhet të marrë një dozë më shumë dhe jo me domosdoshmëri të shqetësohet. Urgjenca nuk merret vetëm me Covid por me të gjitha sëmundjet si ka bërë më parë. 329 mijë thirrje nga 9 Marsi. 2026 thirrje dje, mbi 300 vizita janë bërë në shtëpi. 61% janë në Tiranë. Qershori pari 7000 thirrje më shumë se Maji. Tani kemi dy lloj qytetarësh. Njerëz që kanë frikë dhe marrin në telefon dhe janë të frikësuar dhe njerëz që nuk njohin asnjë të infektuar dhe thonë se virusi nuk është i vërtetë”,-tha Brataj./ Opinion.al
