Ky është shqiptari Bledar Ibrahimi. Ai u dëbua nga Italia drejt vendit tonë pak kohë më parë pas zbulimit të lidhjeve të tij me elementë radikalë dhe dyshimeve për vendosje të kontakteve me Shtetin Islamik.
Gazeta “Corriere della Sera” i ka kushtuar këtë të hënë një profil të gjatë Ibrahimit, pasi ka zbuluar se lidhjet e tij shkonin shumë thellë.
Të dhënat kanë dalë me ndalimin e një pakistanezi pjesë e grupit të shqiptarit. Ibrahimi mbërriti në Itali në moshën 20-vjeçare në një qytezë të Lombardisë, por e mohoi origjinën e tij duke u betuar si ushtar i Kalifatit.
Bledari ndërroi edhe emrin në Facebook, duke u quajtur Yahya Ibrahimi. Në të gjitha postimet ai kërkonte mbrojtjen e Allahut për kalifin e Bagdadit. “Corriere della Sera” shkruan se “emri i Bledar Ibrahimit është më kryesori e më i rëndësishmi në hetimet e antiterrorizmit italian”.
Sipas të njëjtave burime i riu shqiptar ka pasur një rol kyç mes grupeve radikale në Itali. Ai ka pasur kontakte me personave të arrestuar, të dëbuar dhe luftëtarë të ISIS. Në këto komunikime ai njihej me nofkën “profesori”.
Ai u edukua në Egjipt së bashku me motrën e tij dhe burrin e saj italpian, por të gjithë u dëbuan nga aty për fondamentalizëm.
Kthimi nga Egjipti në Itali u bë nëpërmjet Frankfurtit gjë që ka ngjallur dyshime te antiterrori. Pas dëbimit edhe nga Italia ai tani jeton në Elbasan me gjyshin e tij dhe e ka të ndaluar hyrjen në vendet e BE për 10 vjet. /TV KLAN
