Pas finalizimit të ekstradimit të parë nga Dubai drejt Shqipërisë, ministri i Brendshëm, Taulant Balla është shprehur se kjo është bërë e mundur pas aplikimit të një metode komunikimi me Interpol Tiranës dhe Abu Dabit, të cilën e quan “deportim” apo “ekstradim i thjeshtuar”.
Në një prononcim për gazetarët pas komunikimit të vendimeve të Këshillit të Ministrave, Balla ka thënë se rasti i sotëm i jep fund konsiderimit të Emirateve të Bashkuara Arabe si një oaz ku persona me rrezikshmëri kriminale, i shmangen drejtësisë.
Pyetje: A ka filluar zbatimi i marrëveshjes së ekstradimit me Dubain?
“Prej disa muajsh, kemi filluar bashkëpunim intensiv me Interpolin, kryesisht kundër trafikut të narkotikëve dhe një fokus i ri në gjetjen e përsonave të kërkuar nga drejtësia shqiptare. Po punojmë me Ministrinë për të hapur shtigje të reja me vende që nuk kemi marrëveshje. Instrumentat e vendosura nga Interpoli, na bëjnë të mundur që edhe me vend sikur Emiratat e Bashkuara, të përdorim metoda të tjera që do t’i quaja “Ekstradim i thjeshtuar” që ka të bëjë me një metodë komunikimi mes Interpol Tiranës dhe Interpol Abu Dabit dhe bëhet fjalë për një deportim. Pala e Emiratave të Bashkuara e sjell deri në aeroportin e Dubait dhe nga ai moment e më pas, përmes avionit, dorëzohet në aeroportin e Rinasit. Nuk hezitoj ta quaj një arritje të Policisë së Shtetit dhe Inteprol Tiranës sa kohë që ishte konsideruar ky vend si një oaz ku personat me problematikë kriminale të kërkuar me qiri nga drejtësia, kishin gjetur mundësi për ju fshehur drejtësisë. Rasti i sotëm i jep fund konsiderimt të këtij vendi si një oaz i fshehur për t’iu shmangur drejtësisë dhei japim fund një kulture pandëshkueshmërie. Pas rreth 1 muaji, pasi jemi duke negociuar dokumentat do të jem zyrtarisht në Emiratat e Bashkuara për të çuar më tej negocimin e një marrëveshje në fushën e ekstradimeve për të cuar përpara këtë hap të arritur sot”,-tha Balla.
Ministri Balla ka hedhur poshtë mundësinë që i ekstraduari nga Dubai në Shqipëri, Bruno Çobo, të jetë vetëdorëzuar.
