CNN ka publikuar një kronikë për rastin e një shqiptari, peng i skllavërisë moderne. Identiteti i tij nuk është bërë i ditur për arsye sigurie, por raportohet se ai kultivonte hashash.
Shqiptari rrëfen se ishte nisur për të punuar në Britani përmes rrugëve të jashtëligjshme, për të shlyer borxhet që kishte marrë për të mbërritur në Britani dhe për kurimin e babait të sëmurë. Ai pranon se ra në duart e kultivuesve të kanabisit pasi me punë të ndershme nuk shlyente dot borxhet në kohë.
“Shumë vjet më herët, babai im pësoi një aksident. Kështu që unë isha i detyruar që të dërgoja para në shtëpi. Kam dërguar aq sa kam mundur. Kam dërguar aq shumë, saqë ndalja vetëm kur nuk kisha çfarë të çoja më. Njoha dikë këtu që quhej Salam. Nëse i hyn kësaj rruge, nuk ka më alternativë tjetër. Duhet të merresh me këtë gjë. Nuk kam kushte, më duhet të paguaj borxhin, paratë që kam paguar për të ardhur këtu. Ndonjëherë mua ma vlen më tepër të jem në burg e të deportohem sesa në këtë lloj jete’, tregon ai.
Ndër të tjera shqiptari rrëfen se kushtet në të cilat kultivohej hashash ishin më keq se brenda burgut.
“Do të ishte më mirë burgu se aty brenda. Ata kishin krijuar kushte për bimët sepse ato ishin më të rëndësishmet, jo për mua. Kisha një dyshek me ajër dhe një mbulesë për t’u mbuluar. Lejohej të dilja një herë në javë për të paguar taksat dhe për të blerë ushqime”.
Teksa shëndeti i tij përkeqësohej, shqiptari rrëfen se ishte shpëtuar gjatë një operacioni të befasishëm të policisë. Ai thotë se policët britanikë ishin sjellë shumë mirë me të dhe tani është strehuar në një qendër për mbrojtjen e viktimave të skllavërisë.
Ai është në pritje të procedurave të azilit, por rrezikon dëbimin drejt Shqipërisë, ku thotë se i rrezikohet jeta pasi trafikantët mund të hakmerren ndaj tij./Opinion.al
