Me nisjen e skemës se re të faturimit të energjisë elektrike, prej 1 Shkurtit janë marrë të gjitha masat për shtimin e punonjësve të Operatorit të Sistemit të Shpërndarjes. Sipas Zv/Kryeministres Belinda Balluku do të jenë rreth 1 mijë punonjës që do kryejnë rolin e lexuesve të matësve të energjisë.
“Jeni një trup e konsiderueshme, 870 punonjës, të cilët do të shtohen edhe 120 punonjës të rinj, për t’iu dhënë një ndihmë pasi siç jeni të gjithë në dijeni, tashmë duke filluar nga data 1 Shkurt, OSHE do të aplikojë një çmim të ri, 10.5 për qind më të ulët për të gjithë abonentët familjarë”, tha Belinda Balluku.
Balluku u ndal edhe tek marrëveshja trepalëshe mes Shqipërisë-Emirateve të Bashkuara-Italisë sa i përket linjës së interkonjeksionit me këtë të fundit.
“Shqipëria është një nga vendet më mirë të ndërlidhura nga ana e interkonjeksionit me disa linja, atë që e lidh me Greqinë, me Kosovën, me Malin e Zi, një linjë që ndërtohet sot për ta lidhur me Maqedoninë e Veriut, kapacitetet me Greqinë do të shtohen, nisëm një punë për ta dyfishuar, tashmë do ta trefishojmë, për shkak të volumeve që kërkohen përcillen, por nga ana tjetër linja e cila do të lidhë në mënyrë nënujore Shqipërinë me Italinë, e çon Shqipërinë në një nivel tjetër të transmetimit të energjisë elektrike”, tha Balluku.
Duke nisur prej datës 1 Shkurt e deri në fund të Dhjetorit çmimi i ri i energjisë ulet nga 9.5 Lekë në 8.5 Lekë për konsumin deri në 700 KWH, pra ulet me 1 Lekë.
Ndërsa për konsumin mbi këtë vlerë, tarifa do të jetë e pandryshuar, me 9.5 Lekë. Përfitues janë mbi 1 milionë konsumatorë.
Klan News
