Pasi Ministria e Shëndetësisë deklaroi se është e hapur për hetim sa i përket akuzave të opozitës se ka blerë pajisjet mjekësore antiCOVID me çmime më të larta se ato të tregut, Partia Demokratike ka reaguar sërish.
PD kërkon që kryeministri Rama të publikojë kontratën e blerjes së materialeve mjekësore për mbrojtjen e mjekëve në mënyrë që të ballafaqohet e vërteta që thonë të dyja palët.
Në reagimin e saj PD shtron katër pyetje për qeverinë:
“A bleu qeveria 178 mijë maska me 8 mijë lekë copën, kur në farmaci ato kushtojnë 4 mijë lekë?
A bleu qeveria veshje spitalore me 28 euro, kur në treg kushtojnë gati 3 herë më pak, 9.6 euro?
A bleu qeveria, mbrojtëse për sytë me dyfishin e çmimit të tregut, nga 2.9 euro i bleu me 6 euro copën?
A i bleu qeveria edhe maskat spitalore me çmime të dyfishuara, nga 3.8 euro që janë në treg me 8 euro?”, shkruan PD.
“Qytetarët presin përgjigje për këto pyetje. Ata nuk duan të degjojnë akuza dhe sulme banale politike, por kërkojnë të vërtetën e kontratave që qeveria i ka klasifikuar si sekret shtetëror. Në vend të fjalëve boshe, Edi Rama duhet të bëjë diçka fare të thjeshtë: të publikojë kontratën e blerjes së këtyre materialeve! Pastaj qytetarët gjykojnë vetë kush thotë të vërtetën dhe kush vjedh”, përfundon reagimi i tyre. /Opinion.al
