Çmimi i naftës së papërpunuar Brent, që përdoret si standard ndërkombëtar, ka rënë të mërkurën nën 16 dollarë për fuçi, që është çmimi më i ulët në më shumë se dy dekada.
Konrektisht, Brent është tregtuar të mërkurën për 15.98 dollarë për fuçi, që është çmimi më i ulët qysh në qershor të vitit 1999.
Në anën tjetër, nafta West Texas Intermediate (WTI), që përdoret si standard për Shtetet e Bashkuara, është tregtuar për 11.42 dollarë për fuçi.
Vlera e WTI-së ka rënë këtë javë edhe nën zero, për herë të parë në histori.
Rënia e çmimeve ka ardhur për shkak të pandemisë së koronavirusit. Si pasojë e saj, kërkesat për naftë kanë rënë, pasi shumë vende të botës janë izoluar, duke ndërprerë një pjesë të madhe të trafikut ajror dhe rrugor.
Analistët parashikojnë që çmimet do të vazhdojnë të bien, sepse prodhimi i naftës ka të ngjarë të tejkalojë kërkesën për muajt e ardhshëm./Opinion.al
