Bernie Ecclesonte ka befasuar të gjithë sot me deklaratën e tij, kur ka thënë se është më mirë për Botërorin e Formula 1 nëse titullin kampion e fiton Lewis Hamilton. Një deklaratë që ka befasuar të gjithë në botën e Formula 1, veçanërisht kryesuesin e Botërorit, Nico Rosberg, që tashmë duhet të shqetësohet se ka një rival më shumë. Ecclestone, edhe pse ka shitur një pjesë të aksioneve të tij, vijon ende të jetë në krye të Formula 1 dhe sot ka konfirmuar se është tifoz i patriotit të tij Hamilton, por që ka 33 pikë disavantazh në renditje karshi Rosberg.
Në Austin, aty ku nesër zhvillohet gara e Çmimit të Madh të Amerikës, ndodhet edhe Bernie Ecclestone, që duke folur për Botërorin ka thënë: “Nëse titullin kampion e fiton Rosberg do të fitonte vetëm ai dhe Mercedesi. Por kjo nuk do të ndihmonte shumë Formula 1 dhe sportin. Për Nico nuk ka se çfarë të shkruajnë njerëzit, madje edhe në Gjermani nuk ka interes. Kemi nevojë për një personazh si Hamilton, që afron mediat, ndaj është më mirë nëse fiton ai”, tha Ecclestone, që duket se e ka thënë këtë deklaratë në të mirë të Formula 1.
Britaniku Hamilton është një hap pranë fitores së Çmimit të Madh të Amerikës, pas kohës rekord që shënoi ditën e djeshme në provat zyrtare. Ai do të niset i pari gjatë garës së sotme, i ndjekur nga shoku i skuadrës, Rosberg.
