Çmendet Mancester City, ja oferta stratosferike për talentin e Monacos

Manchester City i ka dërguar Monacos një ofertë prej 110 milionë eurosh për Kylian Mbappé, yllin e ri të ekipit të drejtuar nga Leonardo Jardim. 18-vjeçari është në radarin e klubeve më të fuqishme europiane, duke u hapur një ankand i madh për të. Duke e ditur se kohët e fundit Monaco refuzoi një ofertë nga Manchester United, prej 84 milionë eurosh për Mbappé, drejtuesit e “qytetarëve” kanë vendosur të rrisin shifrën e propozuar nga rivalët e të njëjtit qytet dhe të vënë në tavolinë 110 milionë euro. Kaq është çmimi që i ka vendosur Manchester City një lojtari të shumëdëshiruar nga klubet kryesore të Europës, Mbappé, sipas “Metro”.
Kohët e fundit, Pierre Mbappé, xhaxhai i lojtarit, dha një intervistë për “Tuttosport”, në të cilën vuri në dukje se në kohën e duhur familja do të vendosë për fatin e lojtarit, e cila tani për tani është shumë e mirë edhe në Monako. Pierre tha se gjashtë klube janë të interesuara për shërbimet e tij, duke përmendur Barcelonën, Real Madrid, Manchester City, Manchester United, PSG dhe Juventus. Ai nuk përmendi Arsenalin, por “Topçinjtë”, gjithashtu, e duan Mbappé, një objektiv i njohur i Arsene Wenger, teksa ka qenë verën e kaluar personalisht në shtëpinë e lojtarit për të treguar interesin e madh, sepse e konsideron yllin e ri pjesë të projektit të ri të skuadrës që drejton.