Pas lajmit që dha një ditë më parë në mediat gazetari Artan Hoxha, se një deputet ka vizituar në burgun 302 në Tiranë Dritan Dajtin, i akuzuar për vrasjen e 4 policëve, Shërbimi i Kontrollit të Brendshëm ka nisur sot një kontroll për të bërë verifikimet e rastit.
SHKB thuhet se po kontrollin hyrjedaljet që janë bërë ditët e fundit në këtë burg që ndodhet Dajti. “Panorama” u interesua pranë këtij institucioni dhe mësoi zyrtarisht se SHKB po kryen verifikim, që është një procedurë standarte që bëhet pas një informacioni të publikuar në media.
DENONCIMI I ARTAN HOXHES
Gazetari Hoxha ka deklaruar dje se një deputet i komisionit parlamentar të sigurisë ka zhvilluar të hënën një takim në burgun 302, ku ndodhet edhe Dritan Dajti, i akuzuar si kapobandë dhe autor i një masakre të pesëfisht më 7 gusht të vitit 2009 në qytetin e Durrësit, 4 prej viktimave policë. Po në të njëjtin burg ndodhet edhe Kastriot Ismailaj. Deputeti në fjalë ka deklaruar se do të takonte ishzv.drejtorin e Burgjeve, Iljaz Labin, i cili u arrestua për korrupsion, tha Hoxha.
