Më shumë se 280 qendra shëndetësore kanë nisur procesin e akreditimit, i cili ka të bëjë me përmbushjen e standardeve bazë që duhet të ketë çdo qendër shëndetësore për sigurinë dhe cilësinë e shërbimeve për qytetarët. Këtë deklaratë e ka bërë gjatë ditës së sotme ministrja e shëndetësisë Ogerta Manastirliu, e cila mori pjesë në inspektimin e punimeve për ndërtimin e një qendre të re shëndetësore në Sauk.
“Me ligjin e ri të kujdesit shëndetësor që pritet të miratohet së shpejti, akreditimi do të lidhet drejtpërdrejt me licensimin dhe ky proces do të përfshijë jo vetëm spitalet, por edhe qendrat shëndetësore, të cilat duhet të plotësojnë standardet bazë”,-është shprehur ajo.
Në kuvendin e Shqipërisë është duke u diskutuar një projektligj ku të gjitha institucionet e kujdesit shëndetësor si spitalet dhe qendrat shëndetësore pas licensimit të tyre do t’u duhet të kalojnë në procesin e akreditimit ku vlerësohet përmbushja e cilësisë.
Kjo është një kërkesë që shtohet në nenin e ligjit për të saktësuar cilësinë e shërbimit. Sipas këtij propozimi të ri procesi i akreditimit do të nisë vetëm në rastin kur institucionet shëndetësore të plotësojnë standardet bazë të cilësisë për akreditim.
Në momentin kur këto institucione nuk do të përputhin standardet bazë në lidhje me cilësinë e kërkuar do t’u pezullohet licensa. Në ligjin e ri përcaktohet gjithashtu se pas përfundimit të kohës kur është pezulluar licensa sërish nuk janë përmbushur standardet bazë të cilësisë për akreditim ministri përgjegjës për shëndetësinë vendos revokimin e licencës për ushtrimin e veprimtarisë së tyre./Opinion.al/
