Cigaret elektronike, të cilat prej kohësh janë reklamuar si një alternativë më e sigurt për shëndetin, në fakt mund të jenë më të dëmshme se duhani tradicional.
Studiuesit në Universitetin e Kalifornisë, Davis, testuan shtatë vape me aromë nga tre prej markave më të njohura dhe zbuluan se cigaret elektronike njëpërdorimshe lëshojnë më shumë metale toksike që bëhen shkak për sëmundje të rënda.
Studimi, i publikuar në revistën ACS Central Science, tregoi se një nga cigaret elektronike të disponueshme çliroi më shumë plumb gjatë një dite përdorimi sesa gati 20 pako cigaresh tradicionale. Autori kryesor i studimit, Mark Salazar, u shpreh se nivelet ishin aq të larta sa që pajisja mund të ishte prishur.
Nga analiza e cigareve elektronike u arrit në përfundimin se ato përmbanin metale si nikeli dhe plumbi që dëmtojnë indet e mushkëritë.
Brett Poulin, një tjetër autor kryesor i studimit, thekson nevojën për veprim urgjent në zbatimin e ligjeve nga shumë vende në botë.
Qendra për Kontrollin dhe Parandalimin e Sëmundjeve identifikoi markën ELF si markën më të popullarizuar të vape-ve në mesin e adoleshentëve dhe të rinjve në vitet 2023 dhe 2024. Ndërsa Esco Bars shiti produkte në vlerë rreth 82 milionë dollarë në SHBA gjatë vitit 2022. Asnjë cigare elektronike me aromë nuk është e ligjshme për shitje në SHBA, megjithëse FDA-ja ka autorizuar një numër të kufizuar të cigareve pa aromë.
Të dhënat e shitjeve, raportuar nga Reuters, vlerësojnë se në SHBA u shitën në mënyrë ilegale vape me vlerë 2.4 miliardë dollarë vitin e kaluar. Ekspertët e konsiderojnë këtë shqetësuese, pasi produktet nuk rregullohen apo testohen nga asnjë agjenci mbikëqyrëse.
Rreth gjashtë përqind e të rriturve në SHBA, pra rreth 17 milionë njerëz, përdorin cigare elektronike.
