Një çift, prindër të 7 fëmijëve, janë gjetur të vrarë me thikë mëngjesin e të martës në Epinal të Francës.
Mediat franceze raportojnë se çifti la pas fëmijët nga 5 deri në 21 vjeç. Sipas raportimeve të para ato janë goditur me thikë, veçanërisht në pjesën e gjoksit.
Policia zbuloi trupat e pajetë të çiftit me origjinë nga Kosova në banesën e tyre në Avenue du President Kennedy, pasi theu derën. Ata ishin njoftuar nga fqinjët që kishin dëgjuar klithma dhe përleshje, rreth orës 8:30 të mëngjesit.
Kur policia mbërriti në vendngjarje për të ofruar ndihmën e tyre trupat e prindërve 45 dhe 44 vjeç ishin të pajetë.
Mësohet se 4 nga 7 fëmijët, duke përfshirë dy të rritur, nga familja me origjinë kosovare, janë dërguar në spital.
Mediat franceze shkruajnë se “disa dëshmitarë pohojnë se një nga fëmijët adoleshentë mbante një thikë në dorë kur mbërriti ndihma”. Mësohet se çifti kosovarë goditjet fatale i kishte marrë në kraharorë.
Në banesë është sekuestruar një thikë dhe sipas dëshmitarëve, familja ishte shpërngulur në këtë lagje më pak se dy vjet më parë. Bëhet e ditur se nëna kishte qenë viktimë e dhunës në familje dhe disa herë ishte strehuar te një fqinj./Opinion.al
