Milan ka fituar 3-1 në fushën e Chievo Verona, duke u ngjitur në vendin e dytë të Serie A, me pikë të barabarta me Romën, pesë pikë pas Juventus kryesues, ndaj të cilit do të luajë javën e ardhshme në “San Siro”. Juraj Kucka, M’Baye Niang dhe Carlos Bacca (me ndihmën e Dainelli) shënuan golat për ekipin e drejtuar nga Vincenzo Montella, duke i shkaktuar Chievo-s humbjen e parë në shtëpi.
Kuqezinjtë ishin të rrezikshëm që në fillim të ndeshjes së luajtur në Veronë, pavarësisht se e gjetën golin e avantazhit me golin e shënuar nga mesfushori Kucka, me një goditje të saktë, në aksionin e fundit të pjesës së parë.
Sapo nisi pjesa e dytë, Niang realizoi golin e dytë për miqtë, me një veprim të bukur individual, që e konkretizoi me një goditje të fortë nga jashtë zone. Megjithatë, 15 minuta para fundit vendasit u futën në lojë me golin e shënuar nga Birsa me goditje dënimi, por pa arritur t’i mohojnë fitoren e pestë në Serie A skuadrës së Milan, që shënoi edhe golin e tretë në shtesë me një devijim fatlum.
