Giorgio Chiellini njoftoi tërheqjen nga futbolli i luajtur. Ish-mbrojtësi i Juventusit dhe përfaqësueses së Italisë mbylli karrierën në moshën 39-vjeçare. Ai e mori vendimin vetëm pak javë përpara fundit të kontratës me amerikanët e Los Angeles FC.
Vetëm disa ditë më parë, mbrojtësi legjendar kishte lënë të kuptohej se finalja e Major League Soccer e humbur përballë Columbus Crew do të ishte ndeshja e fundit për të.
I njohur me epitetin “King Kong” për forcën fizike dhe duelet e pafundme në fushë, Chiellini mbylli karrierën 23-vjeçare si profesionist. 17 prej atyre sezoneve ai i kaloi me fanellën e Juventusit, ku koleksionoi 561 ndeshje dhe është i treti në klasifikimin special të të gjitha kohërave, pas Del Piero dhe Buffon.
Palmaresi i tij konfirmon karrierën e shkëlqyer. 9 tituj kampion me radhë në Serie A, 5 Kupa dhe 5 Superkupa të Italisë të fituara. Këtyre trofeve u shtohet edhe titulli në kampionatin amerikan, në fundin e vitit 2022.
Me Italinë, Chiellini numëron 117 ndeshje, në 22 prej të cilave ishte kapiten. Pikërisht me shiritin në krah, ai ngriti në Wembleu trofeun e Kampionit të Europës në vitin 2021.
Në të ardhmen e Giorgio Chiellini duket një rol drejtuesit e Juventusi. Klubi bardhezi e përshëndeti legjendën me një video, në të cilën shfaqet fanella më e madhe e krijuar ndonjëherë, që del nga Allianz Stadium.
