Chiara Ferragni, një nga influencueset më të njohura në botë u shpreh se personat që duan të kenë profile në rrjete sociale, duhet të japin fillimisht një mjet identifikimi, sepse kjo mund ti stepë sadopak nga komentet dhe mesazhet negative.
Ferragni tha se ishte e mësuar me to, ndaj disa e bëjnë të buzeqeshë por disa e shokojnë sepse janë vërtetë të mbushura me urrejtje. Ajo shtoi se ka dhe do të ketë gjithmonë njerëz negativë por është me rëndësi të jetojmë sikur këto komente s’ekzistojnë.
“Ngaqë do të jenë lehtësisht të arritshëm dhe të identifikueshëm do të stepen pak dhe nuk do të shpërhapin më negativitet. Do të ishte një zgjidhje e mirë. Ka dhe do të ketë gjithmonë njerëz negativë. Shpresojmë që projektligji t’i pakësojë si numër, por është e pamundur të eleminohen tërësisht. Është me rëndësi të jetojmë sikur këto komente s’ekzistojnë. T’u japësh vlerë këtyre njerëzve do të thotë t’u japësh arsye. Nëse s’ekzistojnë në mendje, s’ekzistojnë në jetë. Le të mos mposhtemi nga negativët. Nëse do të isha mposhtur prej tyre në fillim të karrierës, s’do të kisha bërë asnjë nga gjërat që kam realizuar këto vite.”, tha blogerja e njohur italiane në një intervistë për Sky T24.
Ky debat nisi nga projektligji i propozuar nga deputeti italian, Luigi Marattin, i cili tha që për të luftuar fenomenin e sulmeve virtuale, duhet t’u kërkohet një mjet identifikimi a kod fiskal kujtdo që do të regjistrohet në një platformë online./Opinion.al
