Deputetja demokrate, Albana Vokshi ka reaguar ndaj vendimit të Qeverisë për të ndryshuar moshën e Check-up. Sipas saj, kjo bëhet thjesht për të çuar ca para më shumë në llogarinë e biznesmenes Vilma Nushi. “Edi Rama më 12 tetor ka vendosur ti japë Vilma Nushit edhe 5 milionë Euro më shumë në vit”, tha Vokshi. Ajo i kërkoi Prokurorisë të hetojë këtë koncension.
Sipasa saj, e ka bërë këtë, duke rritur fashën e grupmoshës nga 40-65 vjec që ishte në 35-70 vjeç. Vokshi tha se për të ndryshuar moshën, nuk është bërë asnjë studim.
“Kjo rritje e fashës nuk bëhet për të ndihmuar qytetarët por pë të vjedhur më shumë së bashku me donatoren e tij, Vilmën. Pra ka shtuar rreth 350 mijë qytetarë për regjistrat e Vilmës që përkthehet në 5 mln Euro më shumë në vit për donatoren e tij personale”, tha deputetja demokrate.
“Në vendimin e qeverisë, që është zhdukur nga faqet e Kryeministrisë, Ministrisë se Shëndetësisë apo Fletorja Zyrtare, nuk jepet asnjë sqarim. Nuk ka transparencë. As kampioni i korrupsionit Beqja që bën cdo ditë reklamë për Vilmën nuk tregon asgjë. Kjo është errësira që shoqëron këtë aferë të re korruptive. Si Kryetare e Komisionit për Shëndetësinë, pas shumë kërkesavë zyrtare, prej një viti nuk kam marrë asnjë informacion nga Ministri Beqaj për koncesionin e Vilmës, ndërkohë në ekranet televizive paguhet për reklamimin e kësaj vjedhje shtetërore. I bëjmë thirrje Prokurorisë të mos trembet nga shantazhet e kryeministrit, por të thellojë hetimet të veprojë konkretisht për këtë histori të pashembullt korrupsioni me fondet e shëndetit, me paratë e shqiptarëve”, tha Vokshi.
