Kanë mjaftuar vetëm pak minuta që prej hedhjes në treg, që të shiteshin të gjitha biletat e ndeshjes së shumëpritur, Juventus-Barcelona, të vlefshme për çerekfinalen e Champions League.
Më 11 prill në Torino, “Zonja e Vjetër”, do të presë në fushë të saj “gjigandin katalunas”, ndërsa që tani janë shitur të gjitha biletat.
Vlen të theksohet se biletat nuk dolën fare në të ashtuquajturën “shitje të lirë”, meqë të njëjtat u blenë nga anëtarët e klubit në një procedurë të veçantë.
Kapaciteti i stadiumit të Juventusit është mbi 41.000 ulëse.
Përballja e sivjetme mes Juventusit dhe Barcelonës do të jetë reprizë e finales së Ligës së Kampionëve nga vitit 2015.
Atëherë në stadiumin Olimpik në Berlin, Barca triumfoi me rezultatin 3:1, duke marrë titullin e pestë të kampionit evropian.
