Barcelona do luajë kundër Mynshenglabdahut pa Lionel Mesin, që ka filluar fazën e riaftësimit për dëmtimin muskulor. Trajneri Luis Enrike beson se katalanasit do të triumfojnë në Gjermani, ndërkohë që pret të shkëlqejë edhe portieri Ter Shtegen, i cili do të luajë në shtëpinë e vet…
Ter Shtegen do të luajë në shtëpinë e tij. Mendoni se do ndikohet nga emocionet?
Nuk ka aspak rëndësi. Do jetë kënaqësi për të që të shkëlqejë në atë stadium. Unë e shoh si motivim shtesë, jo si shqetësim.
E njihni Mynshengladbahun?
Kam parë mjaftueshëm ndeshje të tyre dhe mendoj se e di si kanë për të luajtur. Janë një ekip që bëjnë presing shumë lart, që lëvizin me zgjuarsi kur nuk e kanë topin dhe që kanë kundërsulm të rrezikshëm. Kanë cilësi që i sheh rrallë tek ekipe që luajnë kundër nesh. S’kanë për t’u mbyllur në mbrojtje, ndaj do të jetë një ndeshje e bukur.
Do bëni rrotacion?
Liga e Kampioneve është një kompeticion shumë i rëndësishëm dhe nuk shikoj arsye për të bërë rrotacion. Do zbresin më të mirët.
Ka për t’u ndier mungesa e Mesit? Leo është një futbollist që nuk ka nevojë t’ia shprehësh me fjalë rëndësinë, pasi e tregon në fushë. Të gjithë urojmë që të rikthehet sa më shpejt. Gjithsesi, unë sërish kam besim që ekipi do realizojë objektivin ndeshje pas ndeshje duke fituar.
Do jetë Rafinja zëvendësuesi i Leos në fushë, apo Arda Turan?
Nuk e kam vendosur. Dua që t’u jap hapësira të gjithë futbollistëve, por duke parë edhe kondicionin e tyre fizik. Jam i kënaqur me organikën që kam në dispozicion, pasi jemi më të kompletuar se një vit më parë. Statistikat tregojnë se klubet spanjolle vuajnë kur luajnë në transfertë ndaj rivalëve gjermanë… Të jem i sinqertë, unë nuk u besoj statistikave. Nuk bazohen në aktualitet, ndaj edhe s’më kushtëzojnë në përgatitjen e një ndeshje.
