Katër grupet e para të Champions League-s i mbyllën të martën në mbrëmje takimet e tyre, pa sjellë asnjë të papritur mes emrave të skuadrave që kaluan për në fazën tjetër.
Në grupin A, Arsenali e mbylli fushatën në vendin e parë, falë dhe një fitoreje të thellë, 1-4, ndaj Bazelit. Në vend të dytë u renditën francezët e PSG-së, që u ndalën në një barazim 2-2 me Ludogorecin. Ky barazim pati vlerë për bullgarët, të cilët do të vijojnë të luajnë në Ligën e Europës, pasi u renditën të tretët. Aventura europiane mori fund për Bazelin, që në gjashtë ndeshje grumbulloi vetëm dy pikë.
Grupi B ishte ai ku ende kishte pikëpyetje të mëdha gjer para takimeve të së martës. Napoli, që rrezikonte shumë, ia doli të fitonte 1-2 në Lisbonë ndaj Benfikës, duke siguruar vendin e parë në grup. Me fat qenë portugezët, që e morën kualifikimin për shkak të humbjes së Beshiktashit ndaj Dinamos së Kievit. Për turqit qe një mbrëmje ferri në Kiev, pasi humbën 6-0, rezultati më i thellë i mbrëmjes. Për ta, gjyqtari skocez Craig Thomson është përgjegjësi kryesor për humbjen katastrofike. I vetmi ngushëllim për Beshiktashin, që deri tani kishte bërë paraqitje mjaft të mira, mbetet fakti që do të kenë mundësi të luajë në Ligën e Europës. Vendi i tretë ua mundëson turqve këtë, ndërsa Dinamo e Kievit ndalon këtu me vendin e katërt.
Tabloja ishte e qartë në grupin C, ku Barcelona e Mançester Siti e kishin garantuar kualifikimin. Megjithatë, katalanasit nuk munguan të japin spektakël. Me një formacion me shumë ndryshime, Barcelona fitoi 4-0 ndaj Borusias së Mynshegladbahut; Arda Turan qe heroi i mbërmjes me tre golat e tij. Mançester Siti e Sëlltiku barazuan 1-1 në sfidën ndërmjet tyre. Anglezët e mbyllin në vend të dytë fazën në grupe, e skocezët detyrohen të qëndrojnë në shtëpi me vendin e katërt. Gjermanët e Borusias së Mynshegladbahut fituan të drejtën për të luajtur në Ligën e Europës.
Atletiko e Madridit nuk mundi ta ruajë shifrën 0 të humbjeve në grupin D. Një gol i Lewandowski-t në pjesën e parë i dha fitoren 1-0 Bajernit të Mynihut në përballjen me spanjollët, duke marrë hak në njëfarë mënyre për humbjen në Madrid. Në këtë grup mungonin pikëpyetjet, teksa Atletiko e Madridit e kishte siguruar vendin e parë, ashtu siç e kishte siguruar Bajerni vendin e dytë. Në Holandë, PSV Eindhoveni dhe Rostov u ndanë me një barazim pa gola, 0-0. Të zotët e shtëpisë e ndërpresin këtu rrugëtimin, kurse Rostov do të kalojë në Ligën e Europës.
Sonte luhen ndeshjet e fundit të katër grupeve të tjera në Champions League./tesheshi
