Vjen humbja e parë në ndeshje zyrtare për Karlo Ançelotin në drejtimin e Bajern Mynih. Atë ia ka shkaktuar Atletiko Madrid në takimin e Ligës së Kampioneve, pasi bavarezët dolën të mundur nga “Vicente Kalderon”, në ndeshjen e vlefshme për Grupin D të këtij turneu.
Goli i vetëm i kësaj sfide u realizua nga Janik Karrasko në pjesën e parë të ndeshjes, ndërsa madrilenët, të cilit kishin eliminuar klubin gjerman edhe në gjysmëfinalet e edicionit të kaluar, shpërdoruan një penallti me Griezman në minutën e 84 të sfidës.
Në Grupin A, Arsenali ka mundur pa probleme Bazelin në ndeshjen e vëllezërve Xhaka. Taulanti përsëri ka dalë i mundur nga sfida me Granitin, skuadra e të cilit qartësisht kishte një marsh më shumë dhe ka dominuar lehtësisht sfidën. Dy golat e ndeshjes u shënuan nga Uollkot, ndërsa “topçinjtë” shpërdoruan edhe disa raste të tjera shumë të mira për të shënuar.
Në sfidën tjetër të këtij grupi, PSG ka përmbysur një avantazh të papritur të Ludogorets falë Matuidi dhe zgjimit të Kavanit, edhe pse parisienët duket se nuk janë në nivelet e sezonit të kaluar.
Një rezultat surprizë është barazimi 3-3 i Mançester Sitit në fushën e Sëlltikut, ku skuadra e Guardiolës e pa veten tre herë radhazi në disavantazh dhe u desh të djersinte shumë përballë skocezëve. Ky barazim i ka mundësuar Barcelonës të shkëputet pas fitores 2-1 me Borusia Mynshengladbah, ndonëse edhe katalanasit kanë vuajtur shumë për të marrë tri pikët në një duel ku përmbysja erdhi vetëm në pjesën e dytë.
Ndërkaq, Napoli i Hysajt ecën i qetë drejt turit tjetër, pas fitores 4-2 kundër Benfikës. Barazimi mes Beshiktashit dhe Dinamos së Kievit ia bën më të thjeshtë rrugëtimin.
NDESHJET
GRUPI A
Ludogorets-PSG 13 16′ Natanael / 41′ Matuidi, 55′, 60′ Kavani
Arsenal-Bazel 2-0 7′ , 26′ Uollkot
Renditja: Arsenal 4 pikë, PSG 4, Ludogorets 1, Bazel 1.
GRUPI B
Beshiktash-Dinamo Kiev 1-1 29′ Kuarezma / 65′ Tsygankov
Napoli-Benfika 4-2 20′ Hamshik, 51′, 58′ Mertens, 54′ (p) Milik / 71′ Guedes, 86′ Salvio
Renditja: Napoli 6 pikë, Beshiktash 2, Benfika 1, Dinamo Kiev 1.
GRUPI C
Borusia Mynshengladbah-Barcelona 1-2
34′ Hazard / 66′ Turan, 74′ Pike
