Gazetari Artan Hoxha në orën 16:15 shkoi në zyrat e SPAK për të dëshmuar në lidhje me videon që publikoi një ditë më parë ndaj kryebashkiakut të Bulqizës Lefter Alla, i cili dukej teksa konsumonte kokainë në një lokal.
Pas rreth dy orësh, Artan Hoxha ka dal nga SPAK, ku është shprehur se ka thënë gjithçka për çfarë është në dijeni për videon, ku ka shpjeguar dhe mënyrës se si e mori atë.
https://youtu.be/Y0lKkTAaGC0
“I dorëzova materialin filmik prokurorisë. Dhashë shpjegimet e mia për videon. Pres që SPAK të jetë në pritshmërinë e shqiptarëve. Kjo nuk është politike. Nuk më lidhin dot mua me Babale1 apo Babale 2. Unë nuk kam asnjë problem me personin si individ, por me fenomenin. Nuk besoj që ndonjë shqiptar beson se unë dhe Sali Berisha kemi bashkëpunime. Jam i gatshëm për çdo nevojë që do të ketë SPAK, të ndihmoj me informacionin që kam. Nuk vendos unë nëse ka vepër penale por institucionet e drejtësisë. Kemi disa vite që artikulojmë në media, që kemi drejtues të niveleve të larta, që marrim vendime për shqiptarët, nën efektin e lëndëve narkotike. Detyra jonë është të informojmë publikun dhe të jemi syri e veshi për publikun”, tha Hoxha.
Ndërkohë, nga SPAK ka dalë edhe kryetari i Bashkisë së Bulqizës, Lefter Alla, i cili u pyet rreth videos për 1 orë e 30 minuta. Kryebashkiaku, i cili shoqërohej nga avokati i tij mbrojtës Petrit Ismaili, nuk pranoi që të fliste për mediat. duke thënë vetëm që; “E ka në dorë drejtësia. Nuk kam asnjë koment”.
Më herët, Alla është shprehur se është montazh dhe se për videon do të padis ish-deputetin e PD, Ervin Salianjin./ Opinion.al
https://www.youtube.com/watch?v=z948vKHtirY&feature=emb_title
