Mbrëmjen e sotme kryeministri Edi Rama u takua me Sekretarin e Departamentit të Shtetit Antony Blinken në Departamentin e Shtetit.
Sekretari i Shtetit Antony Blinken ka falënderuar Shqipërinë për pritjen e rreth 2 mijë afganëve të cilët u evakuuan nga SHBA gjatë tërheqjes nga Afaganistani.
Blinken: “Më duhet t’ju them Kryeministër atë që më ka mbetur mbresë e do të mbetet për një kohë të gjatë, fakti që, në fillim të verës, pasi shpallëm se do të largoheshim nga Afganistani dhe do t’i jepnim fund luftës atje, ju ishit i pari që u ofruat të prisnit refugjatët, të shpëtuarit afganë dhe kjo është saktësisht ajo që bëtë. Ky është një nderim i madh për ju dhe për bujarinë e Shqipërisë, që iu ofruat një strehë të sigurt mbi 2 000 afganëve. Ju jam mirënjohës për këtë, por edhe për punën që bëni çdo ditë në Europë për sigurinë dhe forcimin e lidhjeve të ngushta, sidomos përmes NATO-s dhe, po ashtu, siç e thashë, në Këshillin e Sigurimit, ku kemi shumë çështje sfiduese për të cilat duhet të punojmë së bashku.”
Nga ana e tij, Kryeministri Rama falenderoi Sekretarin Amerikan Blinken dhe shprehu kënaqësinë për takimin e zhvilluar në nisje të vitit, që shënon 100 vjetorin e vendosjes së marrëdhënieve diplomatike mes Shqipërisë dhe SHBA-ve.
Rama: Është një nder të jem këtu edhe kënaqësi që u shohim në fillim të vitit që shënon 100 vjetorin e marrëdhënieve tona. E vlerësojmë si më të shtrenjtën këtë miqësi dhe jemi krenar që e jemi aleatët tuaj. Do bëjmë çmos për të ruajtur këtë miqësi të veçantë.”
Rama ndodhet në New York për një vizitë zyrtar 4 ditore. Më herët Kryeministri Edi Rama deklaroi, në pritjen e organizuar për nisjen e mandatit të Shqipërisë në Këshillin e Sigurimit të OKB-së, se “kjo është një ngjarje me rëndësi historike për Shqipërinë, që shënon edhe një tjetër gur themelor në rrugën tonë të transformimit për të përmbushur aspiratat tona si komb dhe për të kontribuar që ta bëjmë botën një vend më të mirë për ne dhe për të gjithë”.
Me rastin e fillimit të mandatit të Shqipërisë në Këshillin e Sigurimit të OKB-së, në SHBA u organizua një pritje ku merrnin pjesë Kryeministri Edi Rama, Presidenti i Asamblesë së Përgjithshme, Abdulla Shahid, ministrja për Europën e Punët e Jashtme, Olta Xhaçka dhe personalitete të tjerë të rëndësishëm.
Kryeministri theksoi se “vetëm një imagjinatë pa fre do kishte guximin ta ëndërronte diçka të tillë veç tri dekada më parë. Madje dyshoj se edhe imagjinata më e shfrenuar nuk do kishte qenë dot aq e shfrenuar sa ta ëndërronte këtë tri dekada më parë. Asokohe, Shqipëria ishte një bunker në terr. Për thuajse gjysmë shekulli, ajo u zvarrit nën një nga regjimet komuniste më shtypëse në Europë, që e bëri vendin tonë, më duhet ta them, Korenë e Veriut të Europës”, tha ai.
