Oficeri i Antidrogës, Dritan Zagani rikthehet mbrëmjen e sotme në “Opinion” nëpërmjet video-dëshmive të reja, ku rrëfen përfshirjen e politikës me trafikun e drogës. Janë 6 video të reja të cilat do të publikohen sonte, ndërkohë që 5 dëshmitë e para u transmetuan në emisionin e datës 5 nëntor.
Por cfarë tha Zagani, tashmë në arrati, në videot e para të publikuara?
Në videon e parë Zagani tregoi për kolegët e tij në Polici të cilët e shisnin te trafikantët e drogës dhe lidhjen e kushërinjve të Ministrit Tahiri me trafikun e drogës si edhe përdorimin e makinës së ministrit për këtë qëllim.
Si edhe faktin që të gjitha investigimet e tij kishin shkuar për verifikim në strukturat më të larta të Policisë dhe Prokurorisë por asnjë veprim nuk ishte ndërmarrë. “I vajta në zyrë dhe i thashë nëndrejtor çfarë po bëhet po më shiten informacionet. Nëndrejktori pasi më thirri në zyrë për një veprim të SHKB, se me to merrej jo me luftën kundër drogës dhe pasi më kishin vënë përgjues edhe te makina e punës e kudo tjetër më thirri në zyrë e më tha ..çfarë të thotë vëllai jot dhe ngriti supet.
“Je nëndrejtori,- zotëri i them,- si më thua çfarë të të thotë vëllai, unë po të tregoj se më shiten informacionet, duhet të bëjmë diçka apo të punoj unë në kokë time dhe në një situatë të tillë dy duart për një kokë janë.”
Në një tjetër video Zagani shpjegon arsyet e ikjes së tij nga Shqipëria dhe përse nuk kthehet të flasë për drejtësinë.
“Ata mund të thonë çfarë të duan, unë ia kam bërë me dije ministrit dhe në fun page e tij në fb, se unë nuk kam ik për frikën e tyre apo për frikën e tij, apo për drejtësinë, kam ikur sa të sistemoj fëmijët e mi, në një vend që për momentin nuk mund ta deklaroj për garancinë e jetës së fëmijëve të mi, të cilët janë minorenë.”
Në videon e tretë Zagani i kthehet edhe njëherë pretendimit të Ministrit të Brendshëm Tahiri, se kushërinjtë sipas tij të largët, Habilajt, nuk janë kontigjent i trafiqeve.
Ja çfarë tha Zagani: “Këta shtetas, siç e kam deklaruar edhe më përpara, kanë qenë të njohur nga ana ime dhe e policisë së shtetit, kohë përpara, si element kontingjent të kësaj veprimtarie kriminale. Ata ishin plot në fyt me trafik droge dhe për këtë do të them edhe si verifikohet.
Një muaj pasi transferohem, pasi mi merr këto informacione dhe i pranon me kënaqësi të madhe, shefi i antidrogës së Vlorës, mësoi për lidhjet e tij me vëllezërit Habilaj dhe më e bukura që ishte vetë zoti Lula, banonte dhe banon në Vlorë bashkë me familjen e tij, në një apartament pronë e vëllezërve Habilaj dhe kur mora vesh se çfarë ndodhte atëherë kuptova se nga më rridhnin informacionet.”
Po kështu Zagani në një tjetër dëshmi zbulon edhe se si kushërinjtë e Ministrit Tahiri, emërojnë drejtuesit e policisë në jug. “Eshtë lidhje krejt e thjeshtë, ca qytetarë të cilët pretendohet se janë kushërinj të 17-të, të ministrit, përse duhet të jenë në kafe e lokale me drejtuesit e lartë të Policisë së Shtetit në Vlorë, çfarë lidhjeje kanë, të jap dhe një fakt tjetër, nëse ministri dyshon se unë jam nga Tropoja i them se nga Tropoja ka drejtorinë e Policisë së Kufirit Vlorë dhe e gjen për çdo ditë me kushëririn e tij”
