Partia Demokratike thotë se ka prova që tregojnë se ministri i brendshëm, Sandër Lleshaj ka drejtuar policinë gjatë protestës së opozitës, të shtunën ku nuk munguan përplasjet me policinë si dhe sulmet ndaj saj.
Sipas Enkeljed Alibeaj “ka prova filmike se Sandër Lleshaj, i cili në shkelje të ligjit komandon operacionet e policisë kundër opozitës, është duke u larguar si hajdut nga dera dytësore e Drejtorisë së Përgjithshme të Policisë së Shtetit, pasi njoftohet të shtunën në mbrëmje për zhvendosjen e protestës së opozitës”.
PD akuzon drejtpërdrejt ministrin se ai ka dhënë urdhër për të goditur sekretarin organizativ Sahit Dollapi.
“Prokuroria duhet të nisë hetimet e menjëhershme për të provuar se urdhri për dhunën shtazarake kundër qytetarëve është dhënë nga Sandër Lleshaj me porosi të Edi Ramës. Sandër Lleshaj, Drejtori i Përgjithshëm i Policisë Ardi Veliu, Drejtori i Policisë së Tiranës, Rebani Jaupi dhe krimineli tjetër me uniformë Arben Baro duhet të shkarkohen nga detyra dhe të hetohen menjëherë”, deklaroi Alibeaj.
Dhunën ndaj Sahit Dollapi, Lleshaj e justifikoi duke thënë se policët ishin nën presion dhe se ato pak sekonda prishën gjithë punën e mirë.
“Sigurisht do të kishte qenë mirë që edhe ata punonjës policie që u angazhuan në ndalimin e njërit prej organizatorëve të sulmeve, të kishin bërë diçka ndryshe. Mirë do të ishte që siç duruan në mënyrë stoike, në orë të tëra nën zjarr të kishin menaxhuar ndryshe dhe pak sekonda. Vetëm pak sekonda, gjatë ndalimit të personit në fjalë ndonëse në kushtet e kundërshtimit“, theksoi Lleshaj të dielën. / Opinion.al
