“Nëse në datë 18 Dhjetor, Edi Rama zgjedh me votat e tij Kryeprokurorin, ky është fundi i shtetit ligjor, fundi i demokracisë dhe opozitës i lind detyra të japë përgjigjen e merituar”. Kështu ka deklaruar lideri i opozitës me një grup bashkëatdhetarësh gjatë qendrimit në Londër, por pa specifikuar hapat që do ndërmarrë opozita.
Kryetari i Partisë Demokratike, Lulzim Basha ndodhet prej dy ditësh në Britaninë e Madhe. Ai u pyet në takim me shqiptarët që jetojnë atje për aktualitetin politik në Shqipëri dhe tha se reforma në drejtësi po shkatërrohet me zgjedhjen e një kryprokurori nga mazhoranca. Sipas tij, në këtë mënyrë vendi po rrëshqet në diktaturë.
Me demokratët e Londrës kreu i opozitës diskutoi edhe për demokratizimin e mëtejshëm të Partisë Demokratike duke përsëritur premtimin se deputetët e ardhshëm do të vijnë sipas procedurës së demokratëve londinezë, me parimin një anëtar një votë.
Lulzim Basha ndodhet në Londër me ftesë të Partisë Konservatore Britanike të Kryeministres, Theresa May dhe mori pjesë në konferencën mbi “Sfidat në Ballkanin Perëndimor”. Konferenca e ardhshme e rrjetit të partive të qendrës së djathtë të Ballkanit Perëndimor dhe konservatorëve britanikë do të mbahet në Tiranë në Mars të 2018-ës.
