Është denoncuar një tjetër rast i blerjes së votës, këtë radhë në qytetin e Vlorës. Burime zyrtare nga Drejtoria Vendore e Policisë Vlorë, bënë me dije se është konstatuar një rast në këtë qytet dhe ka nisur procedimi për tre persona.
Për rastin në Vlorë, sipas të dhënave zyrtare u referuan materialet në Prokurorinë e Rrethit Gjyqësor Vlorë, në ngarkim të shtetasve me iniciale A. A.; N. H.; dhe G.O., sepse kanë kryer veprime me shtetas të ndryshëm, për blerjen e votave për subjekte elektorale.
Gjatë ditës së sotme u kap mat, edhe një doganier në Shkodër, pasi iu gjet në makinë një listë votuesish dhe një shumë parash e konsiderueshme. Burime nga policia, thanë se shtetasi Izmir Bushaj, 26 vjeç, banues në fshatin Kullaj, me detyrë doganier në doganën e Vermoshit, dyshohet se ka dashur të blejë votën e disa personave në këmbim të parave.
Sipas ndryshimeve të reja në ligj, shitblerja e votës dënohet në mënyrë taksative nga 1 deri në 7 vite burg. Nuk do të ketë masa ndëshkimore si gjoba, por vetëm burg për ata që do të tentojnë tjetërsimin e vullnetit të lirë të votuesve shqiptarë. Kjo vepër penale, do të jetë e paamnistueshme.
