Presidenti i Kosovës, Hashim Thaçi, në orët e para të mëngjesit ka mbledhur të gjitha strukturat e sigurisë. Në zyrën e Thaçit janë parë duke hyrë drejtori i AKI-së, Shpend Maxhuni, Drejtori i Policisë dhe udhëheqës të institucioneve të drejtësisë. E gjithë kjo po ndodhë pas aksionit i cili po zhvillohet në Veri të Kosovës.
Nga ana tjetër në Beograd është zhvilluar takimi i Këshillit të Sigurisë Kombëtare, të cilin e ka thirrur Presidenti serb Aleksandar Vuçiç.
Tanjug raporton se Vuçiç e paralajmëroi BE-në se Serbia do të reagojë nëse Rosu nuk tërhiqet nga veriu i Kosovës.
Në orët e pra të mëngjesit Policia e Kosovës nisi një operacion në veri dhe jug të Mitrovicës, i cili, deri më tani, ka rezultuar me ndalimin e disa zyrtarëve policorë dhe të disa qytetarëve.
Të ndaluarit dyshohet se janë të përfshirë në disa vepra penale, si: pjesëmarrje ose organizim i grupit kriminal, kontrabandim me mallra, keqpërdorim i pozitës zyrtare, dhënie e ryshfetit, tregti e ndaluar e të tjera.
Për shkak të situatës së nderë, forcat e KFOR-it janë stacionuar në Komunën e Vushtrisë, ndërsa disa automjete janë parë në qarkullim përgjatë autostradës Prishtinë-Mitrovicë.
