Një grup prej dhjetë personash kanë tentuar të dëmtojnë fushën e stadiumit “Selman Stërmasi” në orët e para të mëngjesit të sotëm ( e shtunë). Dyshohet se janë tifozë të ekipit të Tiranës të cilët kanë dashur të sabotojnë terrenin ku të dielën në orën 17:00 është parashikuar të zhvillohet ndeshja mes Partizanit dhe Vllaznisë.
Policia e Tiranës përmes një komunikate për media bën me dije se rreth orës 04:31, Shërbimet e Komisariatit të Policisë Nr. 2 kanë konstatuar rreth dhjetë shtetas të pajisur me vegla pune të cilët po tentonin të kalonin rrethimin e stadiumit “Selman Stërmasi.
Pas sinjalizimit nga ana e patrullës ata kanë tentuar të shpërndahen. Shumica prej tyre kanë mundur të largohen, ndërsa janë kapur në flagrancë dhe shoqëruar pranë ambienteve të Komisariatit të Policisë Nr. 2, shtetasit: A. B., 23 vjeç; M. S., 20 vjeç dhe M. F., 20 vjeç, të tre banues më Tiranë.
Shtetasve të lartpërmendur si dhe në brendësi të rrethimit të stadiumit u janë konstatuar dhe sekuestruar në cilësinë e provës materiale një lopatë me bisht druri, një kazmë me bisht druri dhe bela me bishta druri. Grupi hetimor po punon për sqarimin e rrethanave.
Ky akt vjen pas vendimit të Bashkisë për të lejuar Partizanin për të luajtur në stadiumin ‘Selman Stermasi’. Kjo është hera e dytë e protestës brutale, pasi javën e kaluar tifozët u përleshen me futbollistët e Tiranës gjatë stervitjes.
