Nënkryetari i Lëvizjes Socialiste për Integrim, Luan Rama, pak minuta më parë, ka reaguar për rastin e një makine në Ksamil që shpërndante para në këmbim të votave.
Përmes një deklarate për mediat, Luan Rama ka akuzuar Kryeministrin Edi Rama duke thënë se ka shpërndarë lajm të rremë dhe makina në fjalë nuk i përket një aktivisti të LSI-së, por të “Rilindjes”.
“Kryeministri doli sot dhe tha një lajm të rremë. Strukturat e LSI-së po denoncojnë strukturat e policisë së shtetit, që po bëjnë shantazh dhe po kërkojnë ti bëjnë presion qytetarëve për votën.
Në faqen e LSI në Facebook janë bërë dy denoncime. I pari ka të bëjë me faktin se LSI denoncon një akt kriminal që mban autorësinë e rilindjes. Po ndodh në këto momente në Ksamil.
Makina me targën AA 602 MI e tipit Lancia me 3 anëtarë të Rilindjes po shpërndan para për të blerë votat. Pas këtij lajmi ka dalë një tjetër lajm, me burim të drejtpërdrejtë Ramën që thotë se LSI denoncon një makinë, që me targa është e nënprefektit të LSI-së.
Është e vërtetë që kjo makinë është në pronësi të një qytetari me emrin Ilir Hysi, por ai nuk është Ilir Hysi i LSI-së. Ai është një njeri që ka një biznes të vet dhe që jep makina me qira.
Ilir Hysi i LSI-së ka vetëm një makinë dhe është Mercedez“, tha Rama.
