Situata politike në Kosovë është e tensionuar dhe flitet për krisje të koalicionit qeverisës. Ata kanë mospërputhje sa i përket taksës 100 për qind ndaj Serbisë. Pasditen e sotme u zhvillua një takim i katër liderve të partive të koalicionit, përkatësisht kryetari i PDK-së, Kadri Veseli, ai i AAK-së, Ramush Haradinaj, i Nismas Socialdemokrate Fatmir Limaj si dhe ai i AKR-së, Behgjet Pacolli. Ata nuk pranuan të prononcohen për mediat vendase por disa minuta më parë qeveria ka dalë në një deklaratë, ku thuhet se takimi i jashtëzakonshëm pati rezultate dhe se koalicioni do të vazhdojë.
“Bisedimet u zhvilluan për funksionimin e institucioneve, përmbushjen e agjendës qeverisëse dhe legjislative, me theks të posaçëm aprovimin e buxhetit 2019, pakon e ligjeve përcjellëse, platformën e dialogut dhe çështjen e taksës”, thuhet në deklaratë.
Partnerët e koalicionit janë dakorduar që “ditëve në vazhdim t’i intensifikojnë veprimet dhe aktivitetet drejt harmonizimit të vendimmarrjes për sa u takon temave të sipërpërmendura”, thekson komunikata.
“Platforma e Dialogut do të reflektojë pozicionin unik të institucioneve të vendit për arritjen e një Marrëveshjeje Gjithëpërfshirëse Ligjërisht e Obligueshme, e cila duhet të rezultojë me njohjen reciproke dhe anëtarësimin e Kosovës në OKB”, thekson njoftimi.
Gjithnjë sipas këtij njoftimi, krerët e koalicionit qeverisës “u zotuan për intensifikimin e hapave dhe bashkërëndimin e vendimeve me partnerët strategjikë të Kosovës, SHBA-të dhe BE-në”.
“Është vlerësim i përbashkët se koalicioni është funksional dhe stabil. Do të vazhdohet me përkushtim në arritjen e qëllimeve në përputhje me objektivat programore qeverisëse”, përfundon komunikata e Qeverisë së Kosovës. /Ri-De
