Kryeministri britanik, Boris Johnson nuk do të ishte zhvendosur në njësinë e terapisë intensive nëse nuk do të kishte qenë e nevojshme.
Mjekët britanikë treguan qartë mbrëmjen e kaluar se lëvizja shënon një përshkallëzim serioz në trajtimin e tij pasi në terapi intensive, trajtohen të sëmurët më rëndë.
“Mjekët nuk i kalojnë pacientët në shtratin e terapisë intensive, vetëm për t’i mbajtur nën vëzhgim”, thotë Simon Clark, doktor në spitalin e Universitetit të Reading.
Në terapi intensive disa pajisje vlerësojnë çdo aspekt të trupit të pacientëve, nga rrahjet e zemrës, te temperatura dhe niveli i saktë i oksigjenit, që është një tregues kyç në përkeqësimin e sëmundjes. Por edhe brenda saj, disa pacientë janë më mirë se të tjerët.
Burime të cituara nga “The Times” thanë se gjatë natës, Johnson kishte pasur nevojë për 4 litra oksigjen, krahasuar me 15 litrat që kërkojnë pacientët në gjendje kritike.
Personat e trajtuar me sasi të tillë oksigjeni janë të vetëdijshëm dhe përmes një maske të shtrënguar fort, marrin me presion oksigjenin e nevojshëm për të mbajtur të hapura rrugët e frymëmarrjes.
Por, nëse kjo nuk do të mjaftojë, është i nevojshëm ventilimi mekanik, kur të sëmurët vihen në gjendje kome përmes qetësuesve, intubohen, dhe makineritë kryejnë procesin e frymëmarrjes. Gjithashtu, mbahen nën kontroll zemra, mushkëritë dhe organe të tjera.
Për kryeministrin britanik mund të përdoret makineria ECMO, një pajisje e specializuar, që është më e sofistikuar se respiratori.
“Saint Thomas”, është një prej 6 spitaleve britanike që kanë këtë lloj pajisje. Trajtimi kushton 45 mijë paund dhe shërimi është më i lehtë, pasi i jep kohë mushkërive të rikthehen në normalitet./Opinion.al
