Kreu i Kuvendit të Shqipërisë, Ilir Meta është shprehur sonte se i ka dërguar dy mesazhe kryeministrit Edi Rama ditën e djeshme në lidhje me standardin e zgjedhjeve.
Nisur nga situata e krijuar, e tensionuar pas shkarkimit të disa drejtorëve edhe të LSI-së, Presidenti i zgjedhur që e merr detyrën më 24 korrik tha se i ka kërkuar Ramës të mos cenohen standardet e zgjedhjeve.
“I kam dërguar dje dy sms që duhet t’i ketë mirë parasysh ato çfarë i kam shkruar. Aty në celular i ka mesazhet dhe e di ai. I kam kërkuar që të mos cenohen standardet e zgjedhjeve”, tha Meta duke zbuluar një pjesë të mesazheve.
Ish-kreu i LSI-së dhe ish-bashkëkryetar i koalicionit qeverisës i ka vënë edhe një notë këtij koalicioni.
“Në dy vitet e para koalicioni ka notën 8+. Në dy vitet e fundit nuk e kalon as notën 4”, tha Meta.
