Kryeministri Edi Rama, ka folur në lidhje me Samitin e Belinit në të cilën ishin të pranishëm liderët e Ballkanit dhe Bashkimit Evropian.
Në një intervistë për “Klan Kosova”, kryeministri është shprehur se Samiti ka pasur një ndikim pozitiv për vendeve të rajonit.
Teksa foli për dialogun mes Kosovës dhe Serbisë, Rama tha se ai do të zhvillohet pa kushte dhe do të realizohet fal një pune intensive.
Shefi i qeverisë theksoi se ai nuk e priste që presidenti francez, Emmanuel Macron, dhe kancelarja gjermane, Angela Merkel të përfshiheshin personalisht në këtë proces.
“Mendoj që përkundër të gjitha atyre që kam parë të ziejnë në kazanet e Tiranës dhe Prishtinës, ky ka qenë një moment jashtëzakonisht pozitiv.
Ka pasë një rëndësi të veçantë për shqiptarët sepse është diskutuar gjerësisht për vënien në lëvizje me një ritëm të ri të dialogut mes Kosovës dhe Serbisë. Gjërat janë folur hapur dhe qëndrimet kanë qenë të qarta. Në fund konkluzioni ka qenë shumë i qartë, presidenti francez [Emmanuel Macron] dhe kancelarja gjermane [Angela Merkel] angazhohen në vetë të parë në këtë proces me ekipet e tyre.
Është vendosur një datë për ta rimarrë gjithë procesin pasi të bëhet një punë intensive dhe është përcaktuar qartë që dialogu do të zhvillohet pa kushte dhe pa paragjykime që është shumë e rëndësishme.
Unë personalisht nuk kam pritur asgjë më shumë, madje kam pritur më pak. Nuk e kam pritur që Gjermania dhe Franca dhe posaçërisht të dy liderët [Angela Merkel dhe Emmanuel Macron] do të tregonin gatishmërinë dhe do të angazhoheshin që të përfshihen vet në këtë proces.
“Kjo është një gjë e re në proces, sigurisht që është një proces i BE-së, por tani më Gjermania dhe Franca janë pjesë e procesit dhe kjo është shumë e rëndësishme,”-tha Rama./ Opinion.al E.Xh.
