Teksa qindra mbështetës të Partisë Demokratike protestonin dhe u përplasën me forcat e policisë para bibliotekës së universitetit “Luigj Gurakuqi”, Partia Socialiste me aleatët e saj konstituoi sot këshillin bashkiak të Shkodrës.
Dorëheqja e detyruar e kryetarit të votuar më 30 qershor, Valdrin Pjetri, krijoi një situatë jo normale ligjore dhe kjo shkaktoi tensionimin e situatës si edhe zhvendosjen e mbledhjes nga godina e rektoratit të universitetit në atë të bibliotekës.
Valdrin Pjetri, i zgjedhur me 10.3% të votave si kryetar i Bashkisë së Shkodrës dha dorëheqjen pasi Partia Demokratike publikoi dokumente të një dënimi të tij për shpërndarje droge në vitin 2003 në Firence të Italisë, dënim të cilin ai nuk e ka deklaruar në formularin e dekriminalizimit.
Sipas Ligjit të Vetëqeverisjes Vendore, nënkryetari i bashkisë kryen funksionet e kryetarit kur posti i këtij të fundit është vakant. Por nënkryetari emërohet nga kryetari sipas nenit 61 dhe në kushtet aktuale kemi vakancë edhe në këtë post.
Gjendja jo normale ligjore mund të zgjidhej me një dekret për zgjedhje vendore të pjesshme por presidenti Meta nuk i njeh zgjedhjet e 30 qershorit kështu dhe ka deklaruar se nuk do të shpallë zgjedhje të parakohshme në Shkodër.
“Skenë krimi”, ishte parulla që mbështetësit e PD shpalosën përpara bibliotekës ku po kryhej konstituimi ndërsa sekretari i Përgjithshëm Gazmend Bardhi e quajti këtë një tentativë për të grabitur pushtetin vendor.
Nga brenda godinës së bibliotekës së rrethuar nga forcat e FNSH, mbledhjen e hapi prefekti Çesk Millja, në praninë e deputetit të PSD Tom Doshi , i shpallur i padëshirueshëm nga qeveria e Shteteve të Bashkuara, deputeti Luan Harusha, deputetja Senida Mesi dhe 50 nga 51 këshilltarët e rinj.
Kryetare e këshillit bashkiak u zgjodh, Brisela Kadia, e vetmja kandidaturë. Ajo mori 47 vota pro dhe dy vota u shpallën të pavlefshme. Këshilli bashkiak i Shkodrës pas 30 qershorit përbëhet nga 40 këshilltare të Partisë Socialiste, 9 të PSD, 1 nga PDS dhe një nga Partia Socialiste e Moderuar.
Kryetarja aktuale e këshillit të qarkut, Greta Bardeli, e cila ishte e pranishme në sallë e konsideroi mbledhjen jo të ligjshme dhe antikushtetuese dhe paralajmëroi se organizatorët do të mbajnë përgjegjësi.
Pas mbledhjes situata mbeti e tensionuar madje protestuesit hodhën shishe ndaj deputetit Tom Doshi i cili shoqërohej nga rojet personale dhe këshilltarët e Partisë Socialdemokrate.
“Do të qëndroj në bashki, derisa të ketë zgjedhje të ligjshme,” deklaroi Voltana Ademi, e përlotur para mediave. “30 qershori do të zhbëhet kudo në Shqipëri,” përfundoi ajo.
Qeverisja vendore e Shkodrës mbetet në një situatë jo normale ligjore ndërsa situata politike mesa duket do të mbetet e tensionuar. /Opinion.al
