Gazetari investigativ Artan Hoxha, ka folur në lidhje me arrestimet e ndodhura ditën e sotme në qytetin e Elbasanit.
Mes të arrestuarve nga operacioni i koduar “Krasta” është dhe Florenc Çapja, i cili akuzohet për një krim të ndodhur në vitin 2006.
Gazetari Hoxha shprehu habi se si ka mundësi që në një masë kontrollesh kaq masive në banesa dhe biznese të dy fiseve kundërshtare Çapja – Çela, u sekuestruan një numër i vogël armatimesh, ndërkohë që më shumë pati persona të shoqëruar sesa të arrestuar.
Hoxha shprehet në “Report TV”, se ky operacion mund të ketë pasur dekonspirim, por sipas tij, ky aksion “është një mesazh pozitiv për qytetarët dhe mesazh i fortë kundër krimit”.
Hoxha deklaroi se me të arrestuarve është edhe Bledar Muça, i cili ka kundërshtuar forcat RENEA.
“Forcat speciale dhe FNSH të dërguara nga Tirana kanë bastisur të gjithë zonën ku operojnë kryesisht klani Çapja, kanë kapur disa persona, kanë shoqëruar shumë më tepër sesa kanë kapur. Bledar Muça është ndaluar për shkak të kundërshtimit që i ka bërë forcave të policisë, e ka shoqëruar RENEA. Të kontrollosh një numër kaq të madh banesash dhe numri i armëve që janë kapur është shumë i vogël. Që do të thotë që diçka ka punuar aty brenda…Kemi të bëjmë me grupe që kanë mbi dy dekada në aktivitet. Janë kontrolluar edhe bizneset e krahut tjetër, sepse ka dalë edhe një episod i vitit 2013 ku është i përfshirë Suel Çela“, tha Hoxha.
Më 3 Shkurt të vitit 2016 Bledar Muça dhe Florenc Çapja, i shpëtuan një atentati, ku mbetën të vrarë, Agron Çapja, Eno Bedalli dhe Ardit Sinakolli. Po ashtu, ata kanë qenë të dyshuar edhe për disa ngjarje kriminale të ndodhura në këtë qytet, gjatë viteve të fundit.
Artan Hoxha, ka rikthyer në vëmendje dhe vrasjen e Gentjan Bqirit, ngjarje kjo ë ndodhur në vitin 2012. Edhe kjo ngjarje u zbardh nga hetimet, ndërsa autorët janë shpallur në kërkim.
Gazetari tha se qyteti i Elbasanit është vendi i cili ka numrin më të madh të policëve të vrarë.
Ndërsa, Florenc Çapja u arrestua për tentativën e vrasjes në 2006-ën të Fadil Memës, ish-polic, i cili më pas u ekzekutua në Itali.
“Vrasja e vitit 2012 kur u vra Gentjan Beqiri dhe babai i tij ndërsa ishin në arrest shtëpiak me mbrojtjen e policisë. Në 2016-ën Gentjan Beqirin i kanë ekzekutuar edhe vëllain. Po zbërtheve të parën atje zbërthen gjithë ngjarjet. Është qyteti që ka numrin më të madh të vrasjes së policëve. Uroj që ky të jetë fillimi dhe jo fundit, se Elbasani ka nevojë të vë drejtësi për kaq shumë njerëz të vrarë, dhe njerëz që kanë ikur nga Elbasani për t’i shpëtuar këtyre njerëzve”, theksoi Artan Hoxha.
Ditën e sotme u godit po ashtu dhe një rast korrupsioni në Autoritetin e Medias Audiovize në Shqipëri. Në lidhje me këtë rast, Hoxha u shpreh se ndaj tyre nuk duhet të merret masa arrest me burg, por granci pasurore.
“Ata kanë ndikuar në dhënien e licencave për televizione kabllorë në Elbasan, në lidhje me këtë grup. Shqipëria duhet të ketë një politikë penale, që nëse ekziston mundësia t’i kërkosh atyre garanci pasurore, jo arrestim. Organi i hetimit aty, duhet të paktën pjesën e masave të sigurisë ekstreme ta shmangë sepse janë njerëz që nuk kanë mundësi të dëmtojnë provat dhe nuk do t’i shmangeshin hetimit. AMA është një institucion i rëndësishëm”, tha gazetari Hoxha.
7 persona u arrestuan për korrupsionin në AMA, mes të cilëve dy gazetarë, ndërsa një u shpall në kërkim./ Opinion.al E.Xh.
