Sot në orën 10:00 nisën sërish grumbullimet përpara Drejtorisë së Policisë së Tiranës, aty ku mbahen 13 prej të arrestuarve të Kukësit. Po sot jepet masa e sigurisë në gjykatë për ta. Burimet thanë se protestuesit që mbahen në paraburgimet e Tiranës do të transportohen sot nën masa të forta sigurie në Kukës. Masa e sigurisë për ta pritet të jepet në Gjykatën e Rrethit Gjyqësor Kukës. “Ky është plani deri më tani”, thanë burimet policore, duke lënë të hapur mundësinë për ndryshime në varësi të protestës së opozitës.
Sakaq burime pranë PD thanë se përfaqësues të degëve të PD nga të gjitha rrethet do të jenë në mbështetje të qytetarëve dhe familjarëve të të arerstuarve. Disa protestues janë të vendosur përpara Drejtorisë së Policisë së Tiranës dhe të tjerë pritet të shkojnë tek Gjykata e Kukësit.
Janë gjithsej 24 të arrestuar për dhunë në protestën e së shtunës (31 Mars) tek Rruga e Kombit ku u dogjën pikat e faturimit të koncensionarit. Opozita ka deklaruar përshkallëzim të protestave dhe mosbindje civile. Janë bojkotuar komisionet parlamentare dhe aktualisht gjithë grupi parlamentar i PD është përpara Drejtorisë së Policisë Tiranë.
/Opinion.al
