Dje u njoftua se qyteti historik, Mosuli, i dyti për nga madhësia në IRAK është çliruar nga ISIS. Por sot mediat botërore raportojnë se forcat qeveritare të Irakut po vazhdojnë luftën në disa zona kundër militantëve të Shtetit Islamik.
Kryeministri irakian, Haider al-Abadi, ka vizituar qytetin dhe ka uruar ushtrinë për fitoren e madhe me rikthimin e kontrollit të qytetit. Sakaq sot mësohet se luftime ka ende në perëndim të Lumit Tigër.
Sakaq, gjenerali irakian, Haider Fadhil ka thënë se procesi i pastrimit të qytetit nga eksplozivët, kurthet dhe “qelizat e fjetura” do të marrë disa kohë.
Në qytetin e vjetër pothuajse çdo ndërtese është e pabanueshme.
Të mbijetuarit panë të afërmit e tyre të vriteshin pa mëshirë. Shumë nga ata që tentuan të iknin u qëlluan me snajper nga çatitë e ndërtesave të bombarduara.
Ata që nuk arritën të largohen jetuan të fshehur për 9 muaj. Nëse dilnin nga vendstrehimet ushtarët e ISIS i rrëmbenin për t’i përdorur si mburoja njerëzore.
Por të mbijetuarit e Mosulit tashmë kanë përpara një tjetër luftë, atë me urinë dhe kushtet e rënda humanitare.
Shteti Islamik kishte marrë kontrollin e Mosulit, qytetit të dytë më të madh të Irakut, në vitin 2014 dhe beteja për rikthimin e tij ka zgjatur mbi tetë muaj.
