Stuhia që ka goditur Spanjën la pas shkatërrim në Valencia, Alicante, Murcia dhe Almeria. E cilësuar si më e forta në 140 vjet, stuhia solli dëme të pafundme, dhe raportohet se të paktën 6 persona humbën jetën.
Erërat e forta nxitën krijimin e tornadove të vogla, mijëra persona u evakuuan, teksa lumenjtë dolën nga shtrati dhe njerëz e makina u tërhoqën zvarrë nga vërshimet e ujërave. Të paktën 300 mijë hektarë tokë bujqësore u shkatërrua.
Autoritetet paralajmërojnë se është ende shumë herët për të përcaktuar një bilanc të saktë të dëmeve të shkaktuara nga stuhia më vrastare që prej 1879-tës, kur përmbytjet vranë mbi 1 mijë persona në Murcia dhe Orihuela.
Më e goditura ishte qyteza e Orihuels në Alicante, e cila u izolua për tre ditë nga përmbytjet. Stuhia me lëvizje të ngadaltë filloi të zhvendosej drejt veriperëndimit pasi humbi shumë prej forcës së saj shkatërruese./Opinion.al
